La Banda Sonora de Llar Trad Fest
El folk asturianu guarda verdaderes ayalgues na so discografía. Son munchos los cuidos y celebraos trabayos que dexaron tres de sí los músicos que cultivaron la música tradicional dende los años 80. Sicasí, asocede un fenómenu bien interesante en relación con estos discos: non toos les temes pasen a ser tocaos en sesiones. Los que sí lo faen, tienen de tener nos sos intervalos una maxa qu'afala a los músicos a tocalos en grupu. Son munches les alcordances y les sensaciones que los músicos asturianos guarden tres eses melodíes. Tantes vegaes tocaes en sesiones, tantes vegaes escuchaes en conciertos, en tantos sitios distintos, y siempres espertando esa pasión pela tierra na que se vive y pola música que d'ella sale.
Estes pieces tienen una hestoria propia, y pueden faer apaecer mil sentimientos pol amor que se-yos tien. Puedes llorar colos primeros acordes de La Villa o Candanín, tocaos polos meyores bouzoukistas que pasaron per Asturies: Ígor Mediu y Elías García, respectivamente.
Puedes baillar allegres ritmos ternarios con Chorín el Llagareru o El Molín del Puirtu, y sentir el corazón d'esta tierra llatir con San Roque o'l set de Fandangu Puntiáu/Alborada Asturiana; esta última pieza llamámosla “Allegría”, y usamos esa palabra pa anunciala nos cambeos de tema. Dende Llar queríamos faevos conocedores d'eses xoyes del nuesu repertoriu, y, para ello, teníamos que pidi-y a daquién que fixera una selección. Con éses, nin más nin menos que de la mano de Pepín de Muñalén, ponemos a la vuesa disposición esta playlist de Spotify, que podemos considerar la banda sonora del Llar Trad Fest. Vas oyer estes melodíes nos conciertos, les sesiones, siendo tarareaes… Animáivos a aprendeles, y vais vivir la tradición d'una manera única!!
