Martin Hayes conciertu n’Asturies.
El impresionante Monasteriu de San Salvador de Celoriu acoyerá una velada musical única nel so xéneru. El 27 d’avientu a les 19:00 el vigulineru irlandés mundialmente conocíu, Martin Hayes, ufiertará un conciertu únicu; un xestu d’agradecimientu a la comunidá que tan bien lu acoyó. Hayes presentará un conciertu acústicu gratuitu n’esti impresionante marcu hestóricu.
Martin Hayes, per conocíu mundialmente pol so estraordinariu talentu musical, quier devolve-y a la comunidá asturiana el so sofitu al traviés d’esti eventu tan especial. Conocíu pola so capacidá pa conectar fondamente cola esencia de la música, l’actuación d’Hayes promete ser una esperiencia trascendental. Esti conciertu acústicu, ambientáu na intimidá del monasteriu, nun va tener nenguna amplificación, ufiertando asina al públicu un alcuentru íntimu con so xeniu musical.
Llueñe de ser namás un conciertu, esti eventu tamién ye’l primer actu de recaudación de fondos pa LLAR; una iniciativa que quier revitalizar y cellebrar la cultura y les tradiciones musicales asturianes. Como primer mecenes del LLAR, la participación de Hayes pon de relieve l’importancia na recuperación de la cultura y tamién el renacer de les músiques tradicionales. Esti conciertu sedrá una oportunidá mui especial pa presenciar l’ablucante directu de Martin Hayes; un testimoniu únicu del poder de la música en directu. Espérase qu’esti eventu, con aforu llimitáu, seya una esperiencia irrepetible na vida de los y les asistentes.
Escucha l'últimu discu de Martin Hayes
The Gloaming - Boy In The Gap/The Lobster (en directo en el NCH)
Al rodiu de LLAR: LLAR ye una iniciativa dinámica dedicada al renacer de la música y les tradiciones asturianes que tien como oxetivu revitalizar, afondar y esfrutar del grandísimu patrimoniu cultural de la rexón. LLAR pretende acoyer a públicos diversos al traviés d’un ampliu programa didácticu qu’axuntará clases maxistrales, conciertos y talleres educativos. Anguaño, LLAR céntrase na recaudación de fondos pa financiar los costes del eventu inaugural, incluyíos los honorarios de los profesores y tamién en buscar sofitos pal programa xuvenil; fechu que fai rescamplar el compromisu del proyectu pa cola anovación xeneracional del sector de la cultura asturiana.
¡SOFITA la iniciativa de Llar! Faite mecenes del nuestru REVIVIR CULTURAL.
